«Հայկ Մելիքյանն իր կատարողական զորությամբ և կենսականությամբ տրվում է ստեղծագործությանը` համակ ուշադրությամբ հետևելով իր ներքին ձայներին…»
“Fanfare” ամսագիր
Հայկ Մելիքյանը համաշխարհային ունկնդրի և քննադատների կողմից ճանաչված է որպես Հայաստանի առաջատար երաժիշտներից մեկը, ով իր վառ երևակայությամբ և վիրտուոզ կատարողականությամբ մեր օրերի համաշխարհային դաշնամուրային արվեստում զբաղեցրել է իր եզակի հարթակը: Իր երաժշտական առաջին քայլերն արել է վեց տարեկանից` Իրինա Գրիշինսկայայի ղեկավարությամբ, այնուհետև պրոֆեսիոնալ ուսումը շարունակել է Երևանի պետական կոնսերվատորիայում՝ պրոֆեսոր Ալեքսանդր Գուրգենովի դասարանում: Հայկ Մելիքյանի միջազգային բեմելը կայացել է Հռոմում կայացած “Concerto di Concerti” 20-րդ դարի երաժշտությանը նվիրված միջազգային փառատոնում: Նա ակտիվ համերգային գործունեություն է վարում Եվրոպայի, Ասիայի, Հյուսիսային և Հարավային ամերիկաների բազում երկրներում, ելույթ ունենում այնպիսի հեղինակավոր համերգասրահներում, ինչպիսիք են Ժնևի Victoria Hall, Լիսաբոնի Gulbenkian Grand Auditorium, Ամստերդամի Conertgebouw և այլն:
Հայկ Մելիքյանը միջազգային մրցույթների դափնեկիր է, այդ թվում. Concours d’Orléans (Ֆրանսիա), Ibla Grand Prize (Իտալիա), Yvar Mikhashoff Trust for New Music (ԱՄՆ), Premio Valentino Bucchi (Իտալիա) և այլն: Համաշխարհային ժամանակակից երաժշտության պրոպագանդման համար 2012թ. Մոսկվայի կոմպոզիտորների տան անունից Դաշնակահարին շնորհվել է ոսկե մեդալ: 2013թ. Հայկ Մելիքյանն արժանացել է ՀՀ վաստակավոր արտիստի կոչման:
Հայկ Մելիքյանը հայ և օտարազգի բազմաթիվ կոմպոզիտորների ստեղծագործությունների առաջին կատարողն է, որոնցից շատերը հատուկ գրվել են նրա համար: Այս գործունեությունը հանգեցրեց Դաշնակահարին 2009թ. հիմնելու 1900+ համերգաշարը` նվիրված 20-րդ դարի և ժամանակակից համաշխարհային դաշնամուրային երաժշտությանը։ 2020թ․-ի հուլիսից նաև մեկնարկել է 2000+ նախագիծը, որը նվիրված է բացառապես մեր օրերի կոմպոզիտորների ստեղծագործությունների կատարմանն ու հանրայնացմանը։
Հայկ Մելիքյանի սոլո ալբոմները թողարկվել են տարբեր երաժշտական ընկերությունների կողմից, այդ թվում Naxos-ի՝ դասական երաժշտության աշխարհի առաջատար ընկերության կողմից: 2018թ. ամենամյա ազգային երաժշտական մրցանակաբաշխության շրջանակում Naxos Grand Piano լեյբլի կողմից թողարկված Հայկ Մելիքյանի «Հարությունյան՝ դաշնամուրային լիակատար ստեղծագործություններ» ձայնասկավառակն ընտրվել է որպես “Տարվա լավագույն դասական ալբոմ”: 2020թ․ նոյեմբեր ամսին թողարկվել է նրա նոր ալբոմը վերոնշյալ ընկերության կողմից՝ «Հայկակական գունապնակ» խորագրով։
Աշխարհի տարբեր երկրներում Հայկ Մելիքյանը պարբերաբար վարում է վարպետության դասեր: Նա բազմաթիվ այնպիսի փառատոների հրավիրյալ երաժիշտ է, ինչպիսիք են “Festival de Valmagne” և “Festival de Musique en Côte de Nacre” (Ֆրանսիա), “O/MODERNT” (Շվեդիա), Վարշավայի “Royal Arcades of Art” (Լեհաստան), Սան Լեո երաժշտական փառատոնը (Իտալիա), “Les Musicales de Baabdath” (Լիբանան) և այլն: Դրանցից շատերը ժամանակակից երաժշտությանը նվիրված հանրաճանաչ փառատոներ են՝ «Փարոս» (Կիպրոս), Լվովի “Contrasts”, Կիևի “GogolFest” (Ուկրաինա), Սոֆիայի “ppIANISSIMO” (Բուլղարիա), “Nuovi Spazi Musicali” միջազզգային փառատոնները և այլն:
Հայկ Մելիքյանը համագործակցել է այնպիսի հանրահռչակ կոմպոզիտորների հետ, ինչպիսիք են Դյորդ Կուրտագը, Պետերիս Վասկսը, Տիգրան Մանսուրյանը, Ջոնաթան Հարվին, Կրժիշտոֆ Պենդերեցկին և Պիեր Բուլեզը: 2018թ. Դաշնակահարը կատարել է Արվո Պյարտի Lamentate-ի հայաստանյան պրեմիերան՝ դաշնամուրի և նվագախմբի համար՝ Հայաստանի ազգային ֆիլհարմոնիկ նվագախմբի հետ: 2019թ. Aurora Prize-ի հրավերով Հայկ Մելիքյանը ելույթ է ունեցել Մարիինյան թատրոնի նվագախմբի հետ՝ Վալերի Գերգիևի ղեկավարությամբ:
Որպես կոմպոզիտոր, Հայկ Մելիքյանը հեղինակ է դաշնամուրային, կամերային-գործիքային, վոկալ և նվագախմբային ստեղծագործությունների: