Գերմանացի մեծ կոմպոզիտոր Ֆելիքս Մենդելսոնը պատմության մեջ հետք թողեց նաև որպես ականավոր դիրիժոր, դաշնակահար, Գերմանիայում առաջին կոնսերվատորիայի հիմնադիր-տնօրեն (Լայպցիգ) և աշխարհահռչակ Gewandhaus նվագախմբի հիմնադիր դիրիժոր: Լինելով ռոմանտիզմի դարաշրջանի փայլուն ներկայացուցիչ, նա իր ստեղծագործության հիմքում միշտ ունեցել է դասական արվեստի սկզբունքները: «Շոտլանդական» կոչված սիմֆոնիան Մենդելսոնը գրել է Շոտլանդիա կատարած ուղևորության տպավորության ներքո: Քառամաս դասական կոմպոզիցիայում նա մարմնավորել է իր մտորումները հյուսիսային խստաշունչ բնության, շոտլանդական յուրօրինակ կենցաղի, ժողովրդական երաժիշտների մրցության և ամենակարևորը՝ Մարիա Ստյուարտին վերաբերող մռայլ լեգենդի մասին, որին գահընկեց էր արել և գլխատել նրա մրցակցուհի Ելիզավետան: Այստեղից է տվյալ սիմֆոնիայի երաժշտության ընդհանուր զուսպ արտահայտչաեղանակը: «Շոտլանդականի» պրեմիերան կայացել է 1842-ին Լոնդոնում՝ հեղինակի ղեկավարությամբ: