Քրիստինե Սահակյան, մեցցո-սոպրանո
ՀՀ վաստակավոր արտիստ
Ծնվել է Երևանում: Երաժշտական կրթությունը ստացել է Թաթուլ Ալթունյանի անվան Հայաստանի երգչախմբային ընկերությունում: 1999-ին ավարտել է Երևանի կոնսերվատորիան, այնուհետև ասպիրանտուրան (պրոֆ. Գոհար Գասպարյանի դասարան)։
1998-ին նշանակալի մենահամերգից հետո հրավիրվել է Երևանի օպերային թատրոն՝ հանդես գալու Տ. Չուխաջյանի «Արշակ Բ» օպերայում Փառանձեմի դերերգով, որից հետո նրան վստահվել են այդ թատրոնի մեցցո-սոպրանոյի գլխավոր դերերգերը:
Ք.Սահակյանը մասնակցել է Երևանի օպերային թատրոնի ներկայացումների առաջնախաղերին` «Արշակ Բ», «Ալմաստ», «Աիդա», «Տրավիատա», «Կարմեն», «Անուշ», «Սևիլյան սափրիչ» և այլն: Նրա օպերային դերերգերն են` Փառանձեմ, Ալմաստ, Ամներիս, Ազուչենա, Ադալջիզա, Սանտուցցա։ Քրիստինե Սահակյանի երկացանկն ընդգրկում է բազմաթիվ համերգային ստեղծագործություններ. Մոցարտ՝ Ռեքվիեմ, Վերդի՝ Ռեքվիեմ,Դվորժակ՝ Ռեքվիեմ, Պերգոլեզի՝ Stabat Mater, Ռոսինի՝ Stabat Mater, Բախ՝ Mattheus Passion և այլն:
Քրիստինե Սահակյանը հանրապետական և միջազգային մրցույթների դափնեկիր է: Մասնակցել է մի շարք հեղինակավոր փառատոների և ելույթներ ունեցել Ռուսաստանում, Ֆրանսիայում, Գերմանիայում, Լեհաստանում, Լիբանանում, Հունաստանում և այլուր:
Հայոց Ցեղասպանության 100-րդ տարելիցի միջոցառումների շրջանակներում մասնակցել է գալա համերգների՝ Սանկտ Պետերբուրգի Դ. Շոստակովիչի անվան ֆիլհարմոնիայի մեծ սրահ, Մոսկվայի Երաժշտության միջազգային տան Սվետլանովյան դահլիճ ևԵրևանում՝ «Սպիվակովը հրավիրում է…» փառատոնին:
Որպես մեներգչուհի ելույթներ է ունեցել Ազգային ռադիոյի սիմֆոնիկ նվագախմբի, Պետական ֆիլհարմոնիկ նվագախմբի, Պետական երիտասարդական նվագախմբի, «Սերենադ» կամերային նվագախմբի, Հայաստանի պետական կամերային նվագախմբի հետ:
Ելույթներ է ունեցել հանրահայտ դիրիժորների հետ. Վլադիմիր Սպիվակով, Լիոր Շամբադալ, Բայրոն Ֆիդետցիս, Յուրի Կոչնև, Վլադիմիր Լանդե, Յարեմա Սկիբինսկի, Ջուզեպպե
Սաբատտինի, Յուրի Դավթյան, Օհան Դուրյան, Հովհաննես Չեքիջյան, Էդուարդ Թոփչյան, Կարեն Դուրգարյան, Վահան Մարտիրոսյան, Սերգեյ Սմբատյան:
2002-ից դասավանդում է Երևանում կոնսերվատորիայում: 2014-ից աշխատում է Հայաստանի պետական ազգային ակադեմիական երգչախմբում:
