Այս հռչակավոր կոնցերտը Մոցարտը գրել է 23 տարեկանում՝ հարազատ Զալցբուրգում՝ հերթական հյուրախաղերի կապակցությամբ:
Մենակատարներ էին դառնալու ինքը Վոլֆգանգը և նրա սիրելի քույր Նաներլը: Սակայն Մոցարտի նամակները վկայում են, որ Վիեննայում Նաներլին առանձին դեպքերում փոխարինում էր մեծահարուստ Աուերնհամմերի դուստր Ժոզեֆինան, որը սիրահարված լինելով Մոցարտին մեծ հույսեր էր կապում նման համատեղ ելույթների հետ: Կատարումները տեղի էին ունենում ակադեմիա կոչված հեղինակային երեկույթների ժամանակ՝ իշխանավորների տներում և երազած եկամուտ էին բերում միշտ կախյալ վիճակում գտնվող Մոցարտին:
