Ռ.Շտրաուս: «Թիլ Ուլենշպիգել» սիմֆոնիկ պոեմ, երկ 28 (1895թ.)
Իր սիմֆոնիկ պոեմները Ռ. Շտրաուսը գրել է Լիստի ազդեցությամբ: «Թիլ Ուլենշպիգել» պոեմում կոմպոզիտորին գրավել է ժողովրդական լեգենդը գյուղացի երիտասարդ, համարձակ և ճարպիկ, սրամիտ և կենսուրախ Թիլի մասին, որի կերպարը այսօր էլ մեծ տարածում ունի Գերմանիայում: Իր սկզբունքների համաձայն, Ռ. Շտրաուսը տալիս է Թիլի «սխրանքների» ամբողջ մի շարք: Ձի հեծած Թիլը շուկա է մտնում և խուճապ առաջացնում, ապա հագնելով հոգևորականի սքեմը «քարոզ է կարդում», հետո սեր է բացատրում, բայց նրա զգացմունքը մնում է անպատասխան: Վերջում նա ծաղրում է կեղծ գիտնական պրոֆեսորներին: Նրան մեղադրում են այդ արարքի համար և մահապատժի դասապարտում: Բայց և մահապատժի տեսարանից հետո հնչում է Թիլի կենսախինդ թեման` խորհրդանշելով, որ նրա կերպարը ապրում է ժողովրդի հիշողության մեջ: Նվագախմբի մեծագույն վարպետ Ռ. Շտրաուսը այս անգամ ևս ստեղծել է փայլուն սիմֆոնիկ պարտիտուրա` առանձնացնելով Թիլին բնութագրող երկու հիմնական թեմաներ (գալարափողի և կլարնետի կատարմամբ):