Գևորգ Ղարաբեկյանը հայտնի է իր մշտական ստեղծագործական որոնումներով, պատրաստ լինելով նոր կատարողական մեկնաբանությունների:
Ղարաբեկյանը Բազելի (Շվեյցարիա) I TEMPI կամերային նվագախմբի գլխավոր դիրիժորն է: Նա միջազգային ճանաչում է ստացել իր բազմաթիվ համերգների և ձայնագրությունների շնորհիվ:
Իբրև ջութակահար Երևանում սովորել է անվանի մանկավարժներ Պետրոս Հայկազյանի, Արտաշես Մկրտչյանի, ինչպես և Էդուարդ Թոփչյանի ղեկավարությամբ: Նա եղել է «Սերենադ» կամերային նվագախմբի անդամ:
Տասնինը տարեկանում մեկնել է Ֆրայբուրգ իմ Բրայսգաու(Գերմանիա)՝ պրոֆ.Ռայներ Կուսսմաուլի մոտ ուսանելու նպատակով: Ապա մեկնել է Բազել, որտեղ կատարելագործվել է Ադելինա Օպրեանի ղեկավարությամբ (ջութակ), իսկ բարոկկո ջութակ է ուսումնասիրել Կյարա Բանչինիի մոտ:
Որպես ջութակահար արժանացել է Արամ Խաչատրյանի անվան մրցույթի 2-րդ մրցանակին: Իբրև կոնցերտմայստեր աշխատել է Գերմանիայի և Շվեյցարիայի սիմֆոնիկ և կամերային նվագախմբերում:
2009-2011-ին Ղարաբեկյանը դիրիժորություն է սովորել Լյուցերնի երաժշտական համալսարանում՝ պրոֆ. Ռալֆ Վայկերտի ղեկավարությամբ:
Դավիդ Զինմանի կրթաթոշակի շնորհիվ Գևորգ հնարավորություն է ստացել մասնակցելու հեղինակավոր Aspen Music Festival-ի «Ամերիկյան դիրիժորության ակադեմիայի» դասընթացներին:
Մասնակցել է անվանի դիրիժորներ Ռիկարդո Մուտիի, Նեեմե Յարվիի, Պաավո Յարվիի, Տուգան Սոխիևի, Դավիդ Զինմանի, Դանիել Գատտիի և Գենադի Ռոժդեստվենսկու վարպետության դասընթացներին:
Ֆիննացի հայտնի դիրիժոր Յորմա Պանուլայի արտահայտությամբ. «Ղարաբեկյանը գեր-երաժշտական օժտվածության տեր դիրիժոր է»:
Որպես դիրիժոր Գ.Ղարաբեկյանը համագործակցել է Ցուրիխի Tonhalle Orchestra, Lucerne Symphony Orchestra, Orchestre National du Capitole de Toulouse, Beethoven Orchestra Bonn, Jena Philharmonic և այլ հայտնի նվագախմբերի հետ:
Հանդիսանալով VIWA ասոցիացիայի նախագահ, սկսած 2020 թվականի արցախյան պատերազմի առաջին օրերից, Ղարաբեկյանը ակտիվորեն աջակցել է Հայաստանում գործող կրթական և մարդասիրական նախագծերին:
Գևորգ Ղարաբեկյանը իր ընտանիքի հետ ներկայումս բնակվում է Բազելում:
