Ծնվել է Երևանում՝ 1999-ին: Ուսումը սկսելով Երևանի Չայկովսկու անվ. ՄՄԵԴ-ում (պրոֆ. Գագիկ Սմբատյանի դասարան), 2015-ից այն շարունակել է Գրացի համալսարանում՝ պրոֆ. Բորիս Կուշնիրի ղեկավարությամբ:
Արեգ Նավասարդյանը միջազգային մրցույթների դափնեկիր է. Դեմիդովսկու անվ. 8-րդ մրցույթ (Եկատերինբուրգ, 2019, 2-րդ մրց.), New York International Artists Competition (ԱՄՆ, 2014, 2-րդ մրց.), American Protégé International Competition (ԱՄՆ, 2013, 1-ին մրց):
Արեգը եղել է Premio Paganini International Competition-ի (2018) և Carl Flesh Competition-ի (2018) կիսաեզրափակիչ փուլերի մասնակից:
2012-ին նա մասնակցել է Յուրի Բաշմետի պատանեկան Երաժշտական ակադեմիայի դասընթացներին (Սամարա) և նվագել եզրափակիչ համերգին:
Արեգ Նավասարդյանը վարպետության դասեր է առել Ալեքսանդր Տրոստյանսկուց (Սամարա), Շլոմո Մինցից (Շվեյցարիա), Բորիս Կուշնիրից, Միհաելա Մարտինից, Պավել Վերնիկովից, Քշիշտոֆ Վեգժինից, Դեյվիդ Կերոնից, Զախար Բրոնից, Վիկտոր Դանչենկոյից և այլ հայտնի երաժիշտներից:
Մասնակցել է տարբեր համերգների և փառատոների Հայաստանում, Ռուսաստանում, Վրաստանում, Ավստրիայում, Իտալիայում, Շվեյցարիայում, Հունգարիայում և ԱՄՆ-ում (Carnegie Weill Hall), Ջենովայում (Teatro Carlo Felice), ինչպես և UNESCO-ի կազմակերպած համերգներին:
Արեգը հանդես է եկել «Կիևի մենակատարների» (դիրիժոր՝ Շլոմո Մինց) Հայաստանի պետական կամերային նվագախմբի (դիրիժոր՝ Վահան Մարտիրոսյան), Եկատերինբուրգի Licei-Camerata-ի (դիրիժոր՝ Անտոն Շնիտկին), Michelangelo String Quartet-ի և այլ երաժշտախմբերի հետ:
2018-ին իտալացի դաշնակահար Գվիդո Բոտարոյի հետ Արեգը հանդես է եկել Paganiniani di Carro փառատոնում (Իտալիա): Նույն թվականին կատարել է ժամանակակից իտալացի կոմպոզիտոր Վիրջինիո Ձոկատելլիի ստեղծագործությունը՝ Իտալիայի Երիտասարդական նվագախմբի հետ (դիրիժոր՝ Մարկո Սոմադոսսի):
2019-ի հունիսին նա մասնակցել է Kronberg Academy-ի վարպետության դասընթացներին՝ Պավել Վերնիկովի ղեկավարությամբ, իսկ սեպտեմբերին Tsinandali Festival Academy-ի դասընթացներին և համերգներին՝ Միհաելա Մարտինի, Գաբոր Տակաչ-Նեգիի, Պինխաս Ցուկերմանի ղեկավարությամբ:
Արեգ Նավասարդյանը նվագում է Յակուբ Տոպորի կերտած ջութակով: