Մաքս Բրուխը 19-20-րդ դարերի սահմանագլխի գերմանացի հայտնի կոմպոզիտոր է՝ օպերաների, օրատորիաների, սիմֆոնիաների, գործիքային կոնցերտների, կամերային անսամբլների, խմբերգերի և երգաշարերի հեղինակ: 1893-ին Չայկովսկու, Սեն-Սանսի, Գրիգի
և Բոյտոյի հետ միաժամանակ նրան շնորհվել է Քեմբրիջի համալսարանի երաժշտության դոկտորի պատվավոր կոչում: Բրուխի լայն ճանաչում ստացած Ջութակի կոնցերտը գրվել է 1866-ին և նվիրվել Յոզեֆ Յոախիմին, որը և դարձել է այդ ստեղծագործության առաջին
կատարողը (1868թ., Բրեմեն): Այս Ջութակի կոնցերտը գավիչ է իր մեղեդիներով, պաթետիկական գործիքային ասերգերով, վիրտուոզային — տեխնիկական հագեցվածությամբ: Երաժշտությունը զարգանում է լայն շնչի ալիքներով, որոնք հանգեցնում են լարված բարձրակետերի: Այս Կոնցերտը սիմֆոնիկ երկացանկի ամենատարածված գործերից է, որը հնչում է տարբեր երկրներում՝ առաջատար ջութակահարների կատարմամբ:
1. Vorspiel: Allegro moderato
2. Adagio
3. Finale: Allegro energico
