Ավստրիացի և ամերիկացի կոմպոզիտոր, դիրիժոր և մանկավարժ Է.Վ.Քորնգոլդը աշխատել է օպերայի, սիմֆոնիկ երաժշտության և կինոերաժշտության ասպարեզում: 1906 թվականին Գուստավ Մալերը լսելով պատանի Քորնգոլդի ստաղծագործած Կանտատը, նրան անվանել է հանճար:
Ջութակի կոնցերտը նվիրված է Գուստավ Մալերի կնոջը՝ Ալմա Մալերին: Ստեղծագործությունը կազմված է 3 մասից: Այստեղ դրսևորվեց Քորնգոլդի երաժշտությանը բնորոշ ռոմանտիկական ուղղվածությունը:
Կոնցերտում կոմպոզիտորը օգտագործել է ֆիլմերի համար գրած իր երաժշտության հատվածներ: Քննադատներից մեկի արտահայտությամբ Կոնցերտը միավորում է կոմպոզիտորի կենսական ուժը և գերազանց վարպետությունը: Քորնգոլդի երաժշտությունը աչքի է ընկնում արտահայտիչ մեղեդայնությամբ, քնարականությամբ և բարդ պոլիֆոնիկ հյուսվածքով:
Ջութակի կոնցերտի պրեմիերան իրականացրել է Յաշա Հայֆեցը 1947 թվականի փետրվարի 15-ին՝ Սենթ-Լուիսի սիմֆոնիկ նվագախմբի հետ: Որոշ ժամանակ անց, Հայֆեցը այս ստեղծագործությունը մեծ հաջողությամբ կատարել է նաև Նյու Յորքի ֆիլհարմոնիկ նվագախմբի հետ, Կարնեգի Հոլլում՝ Եֆրեմ Կուրցի ղեկավարությամբ: Հայֆեցի կատարումը լսելով կոմպոզիտորը ասել է.«Ես երջանիկ եմ, որ Հայֆեցը իր մեկնաբանման մեջ համատեղեց Կարուզոյի և Պագանինիի արվեստը»:
1. Moderato nobile
2. Romance
3. Allegro assai vivace
