Չեխական ազգային կոմպոզիտորական դպրոցի հիմնադիր Բեդրժիխ
Սմետանայի ստեղծագործության մեջ առանձնահատուկ է «Իմ
հայրենիք» սիմֆոնիկ վեց պոեմներից կազմված շարքը: Որպես
օրինակ ընդունելով Լիստի հայտնագործած ծրագրային միամաս
սիմֆոնիկ պոեմի ժանրը, Սմետանան մեկնաբանում է այն որպես
ամբողջական ցիկլ, որտեղ տալիս է Չեխիայի պատմության, ժողովրդի
կյանքի, բնության, լեգենդների և առասպելների միասնական
պատկերը:
«Վիշեգրադ» (Vyšehrad) պոեմը պատկերում է Չեխիայի մայրաքաղաք
Պրահայի, միջնաբերդը և այն պատմական անցքերը, որ տեսել է
Վիշեգրադը իր բազմադարյա գոյության ընթացքում: Պոեմի հիմքում
ընկած երաժշտական թեման, որը խորհրդանշում է ժողովրդական
երգիչ Լումիրի կերպարը, հետագայում հնչում է նաև շարքի մյուս
պոեմներում, ընկալվելով որպես յուրատեսակ հայրենիքի լայտթեմա:
«Վլտավա» (Vltava) պոեմը պատկերում է Չեխիայի հայտնի գետը, որը ծնունդ է առնում երկու ակունքներից, նրա հանդարտ ընթացքը և այն ամենը, որ հանդիպում է գետն իր ճանապարհին. գյուղական հարսանիքի և որսի տեսարաններ, լուսնի լույսով ջրահարսերի խաղ, հայտնի Սվյատոյանովսկի սահանքներ, Պրահա մայրաքաղաքը և նրա Վիշեգրադ միջնաբերդը և, վերջապես. Էլբա գետը, որի վտակն է Վլտավան: Պոմեի երաժշտական հատվածները միավորված են կենտրոնական Վլատվա գետի թեմայով:
«Շարկա» (Šárka) պոեմի հիմքում է չեխական ժողովրդական լեգենդը
կին հերոսուհի Շարկայի մասին, որը յուրատեսակ ամազոնուհի
լինելով իր ընկերուհիների հետ պաշտպան է կանգնում հայրենիքին:
«Չեխական դաշտեր և անտառներ» (Z českých luhů a hájů): Այս
պոեմում Չեխիայի բնության երաժշտական պատկերն է:
«Տաբոր» (Tábor)՝ նվիրված է Չեխիայի հարավային Տաբոր
քաղաքին, որի հետ կապված են Չեխիայի ազգային ազատագրական
պայքարի պատմական էջերը:
«Բլանիկ» (Blaník): Պոեմը պատկերում է չեխական Բլանիկ լեռը, որի
քարանձավներում հանգչում են զոհված հերոս ասպետները՝
պատրաստ լինելով կրկին կյանք առնել և շարունակել պայքարը
հայրենիքի ազատության համար: Այս եզրափակիչ պոեմի
երաժշտությունը միավորում է նախորդ բոլոր պոեմների թեմաները:
